Communiqué:
Nodeems d’Madamme Gaby Bruch-Forster an der Gemengerotssitzung vum 13.07.2018 ugekënnegt hat hir Demissioun als Gemengeconseillere anzereechen ass den Nächstgewielten vun der LSAP-Lëscht, den Här Vincent Nothum, den 16.08.2018 a Präsenz vum Schäffen- a Gemengerot vum Buergermeeschter Paul Weimerskirch vereedegt ginn.
De Vincent Nothum ass 1978 zu Diddeleng op d’Welt komm, ass mam Alexandra Reinert bestuet a Papp vun engem Bouf. Vu Beruff ass hien Schoulmeeschter an deemno leit et op der Hand dass hien sech besonnesch fir den Enseignement an d’Jugend well asetzen an net ze vergiessen de Sport, deen hien wärend 27 Joer mat vill Erfolleg bedriwwen huet.
Bei den Walen vum Oktober 2017 war hien mat 1.394 Stëmmen den 8-Gewielten op der LSAP-Lëscht.
Mär wënschen dem Vincent Nothum eng glécklech Hand bei der Ausübung vun sengem Mandat.
D’Observatioun vun der Mounddäischtert, den 27. Juli 2018, war jo am Land op Grond vun de Wolleken, déi sech Nuets afonnt hunn, net einfach. An eise Nopeschlänner konnt jo eng quasi perfekt Mounddäischtert erlieft ginn. Op ville Plazen hei am Land, wou Leit sech versammelt haten, war et jiddefalls oft net evident. Mam Teleskop ass et trotzdeem zäitweis gaangen. Eise Matbierger Roby Kieffer huet ons dës Biller, déi zu Schëffleng realiséiert gi sinn, zougestallt. Merci dem Här Kieffer, datt mir dësen Himmelsspektakel, deen bal zwou Stonne gedauert huet, op de Biller kënne novollzéien. Déi nächst Mounddäischtert ka kommen. Allerdéngs musse mir laang waarden.
